鸿蒙文学网

手机浏览器扫描二维码访问

第三十四回返歇浦喜获小偷儿过中秋恩赦众漂匪（第5页）

阿金笑道：“对是蛮对，不过便宜（读热）点格班漂匪，好得倪拾（读疾）着一注外快勒里，勿然，是倪照实梗，先要尴尬哉！”

阿金道：“讲哉，辰光已经勿早，将近四记钟哉，阿要走罢！”

宝玉道：“唔笃两家头，合坐仔奴格包车勒去，就快哉。”

两人答应，立刻拿了宝玉名片，下楼唤了自己车夫，交代到某处某处，匆匆上车而去。

直到晚膳时候，方始归家覆命，只收得二百余元，先交宝玉收了，然后慢慢的细说道：“倪走仔十几家，只有赵老笃、钱老笃，总算结清格，孙大少笃、李三少笃，收着仔一半；归搭周老笃、何大少笃、郑二少笃、王三少笃，才说明朝送得来；还有金、魏、陶、姜四家，才推头勿勒屋里，明朝自家来呀；单剩两家小户头，来勿及去格哉。

横势有几家勿送得来，倪还要跑一埭，终归罢勿成格。”

宝玉道：“随便送来勿送来，唔笃勿必再去讨哉，小户头末看得见格，白走俚作啥嗄！

凭俚笃格良心罢，倒是有六七家节盘，唔笃板要去送格，带道请俚笃过来吃酒，说奴勒里牵记佬。”

二人连称晓得。

次日一早，备齐六七副盘，每家四色，叫鳖腿等挑了，跟着二人到各家分送，兼请众客来饮酒，赏玩中秋佳节。

这都是堂子里的老例，毋庸细表。

午后两人归来，回覆宝玉，说各家盘已送毕，有的全受，有的受了一半，所有开销的脚钱，一共有四十余元，呈与宝玉过目。

宝玉自己一毫不取，均分赏与众人开拆，众人无不欢喜。

阿金又说所请各客，应允来的只有四位，宝玉点首，既而告诉阿金道：“昨日唔笃去讨帐，说送得来格几家，单单郑二少笃末，饭前来过格哉，归搭一家才勿来，阿要希奇！

倪做仔长远格生意，真真第一转碰着。”

阿金道：“一来倪出坏仔一埭门；二来故歇格节，新做格几户，滑头多仔两个；三来格种漂匪，勿多讨几埭，坍俚格台，勿会情情愿愿送得来格。

大先生，倪阿要再去跑一埭罢。”

宝玉正要回答，忽见一个相帮拿着一封洋钿、一张字条，进来递与阿金，阿金一接，说：“等一等勒下去吓。”

宝玉问道：“啥人家格介？”

阿金道：“我是勿识字格。

自家去看罢。”

宝玉将字条一看，原来是周家的，计有八十余元。

命阿金拿一张片子，交相帮下去写了一个收字，另外开销了几块钱，照例打发来人去讫，宝玉方与阿金说道：“总算亦来仔一户哉，来格自会来，勿来格存心漂帐，或者实头拿勿出，唔笃讨也呒买用格，倒是气量大子点罢。”

阿金道：“大先生，格气量真大，呒人及得来格。

不过想想格种漂帐格人，漂倪格铜钿，勿晓得罪过格，倪贴仔身体，赔仔本钱，叫仔俚笃好听，陪仔俚笃白相，等到节浪讨帐，还实梗疲赊卡欠，有格有钿勿速落，有格空心大老官，阿要气数，赛过骗子拐子，就骂声俚漂匪，也勿罪过格哉。”

宝玉道：“去说俚哉，譬如倪恩赦仔格班漂匪罢。

况且故歇辰光，不过四点多钟，作兴有几家送得来，也未可知格。

就算呒不，奴也勿要紧。

格张汇票，刚刚差管帐格去拿格哉，尽够开销，算起来还多千把，落得做做好人，买点名气勒外头罢！”

两人正当议论，忽听楼下叫人钟鸣，知有客人来了，彼此方才停口。

正是：

顿教秋节从容度，且博佳名慷慨称。

要晓得来者是谁，暂停片刻奉告。